Ministria e Shëndetësisë jep njoftim të rëndësishëm

135
Ministria e Shendetesise dhe Mbrojtjes Sociale njofton se te gjitha Spitalet universitare, rajonale dhe bashkiake, Shërbimi i Urgjencës Mjekësore janë në gadishmëri të plotë 24/7 për çdo emergjencë shëndetësore.
Në dispozicion është edhe numri 127 i urgjencës mjekësore, për çdo situatë me të cilën mund të përballen qytetarët si pasojë e motit të keq.
Ministria e Shëndetësisë dhe Mbrojtjes Sociale po ndjek nga afër nëpërmjet Ekipit të Emergjencave shëndetësore situatën e përmbytjeve në vend dhe garanton shërbimin shëndetësor në të gjithë vendin.
Lidhur me situatën e emergjencës së krijuar në nënstacionin elektrik të Shkodrës ku u plagosën 3 punonjës të OSHEE, informojmë se aktualisht po trajtohet në spitalin e Shkodrës një nga punonjësit e OSHEE, ndërkohë që po transportohen drejt Tiranës për një mjekim më të specializuar dy punonjësit e tjerë që ka pësuar djegie të një shkalle më të rëndë.
Ministria e Shëndetësisë dhe Mbrojtjes Sociale sqaron gjithashtu se: Lidhur me informacionin e pasaktë për situatë kritike në spitalin e Pukës për shkak të motit të keq, bëjmë me dije se Spitali i Pukës është në kushte normale insfrastrukturore dhe aspak i dëmtuar nga moti I keq që ka përfshirë vendin ku shërbimi shëndetësor ofrohet normalisht. Një dëmtim ka ndodhur në çatinë e qendrës shëndetësore të Pukës, por pa shkaktuar dëme brenda qendrës.
Megjithatë, shërbimi që ofrohet në Qendrën Shëndetësore është zhvendosur në ambientet e bollshme brenda spitalit të Pukës, deri në riparimin e dëmeve të jashtme të kësaj qendre. Të gjitha strukturat e Ministrisë së Shëndetësisë dhe Mbrojtjes Sociale janë në gadishmëri të plotë në këtë situatë emergjence.