Gjykata Kushtetuese ka nisur shqyrtimin e kërkesës së PD për ligjin për Këshillin e Lartë të Gjyqësorit, KLGJ, dhe Këshillin e Lartë të Prokurorisë, KLP. Ne dhjetor të vitit 2016, PD ankimoi ligjin “Për organet e qeverisjes në drejtësi”, në kërkesë shpalljen anti-kushtetues të disa neneve të ligjit.
Në ankimimin e bërë, ekspertët e Partisë Demokratike theksojnë se formula e përcaktuar në ligj për zgjedhjen e 5 anëtarëve nga Parlamenti në Këshillin e Lartë Gjyqësor dhe Këshillin e Lartë të Prokurorisë është në shkelje të ligjit themeltar të shtetit.
Kushtetuta përcakton se për këto dy institucione, 2 anëtarë zgjidhen nga avokatët, 2 nga trupa e pedagogëve, dhe 1 nga shoqëria civile. Ligji ka parashikuar si mekanizëm filtrimin e një komision ad hoc të pavarur, i cili vlerëson dhe skualifikon kandidatët duke hartuar listën finale me 10 emra.
Demokratët thonë se me parashikimet e bëra në ligj, mazhoranca i dha shkelmin konsensusit të 21-22 korrikut, pasi më herë palët ranë dakord që procesi për përzgjedhjet e anëtarëve të KLGJ dhe KLP të niste në Kuvend, duke përfshirë sekretarin e përgjithshëm të Kuvendit dhe një komision me 5 anëtarë dhe votim me 2/3.
Me kërkesë të demokratëve atëherë u rrëzua pika që parashikonte që Këshilli i Emërimeve në Drejtësi të ishte komisioni që bënte renditjen e kandidatëve dhe t’ia dërgonte Kuvendit për miratim. Juristët demokratë gjatë dorëzimit të ankimimit, thanë se përmes ligjit mazhoranca prish marrëveshjen historike të 21-22 korrikut.
