Kujdes, këto ushqime vështirësojnë procesin e tretjes

748
Nëse keni probleme me procesin e tretjes në organizmin tuaj, atëherë duhet të bëni kujdes me disa ushqime, të cilat e vështirësojnë këtë proces. Këshilla tepër të vlefshme ju vijnë nga dietologe të huaja.
Agrumet
Kur keni vështirësi në tretje, ideja për të zgjedhur ushqime të shëndetshme, si fruta dhe perime, mund t’ju duket diçka e mirë. Por në të vërtetë, paradoksalisht, rrezikohet të agravoni problemin, sepse edhe një ushqim për të cilin nuk dyshonit aspak, mund të transformohet në një “vrasës” të vërtetë për stomakun, duke shkaktuar gazra dhe fryrje.
“Ushqimet me acid, si lëngu i limonit dhe portokallit, mund të irritojnë vazhdimisht muret e stomakut dhe pasojat fillestare janë djegia dhe urthi. Ndaj, është më mirë që të shmangni agrumet derisa të ndiheni më mirë dhe të preferoni më shumë mollë të pjekura dhe banane, të cilat jua heqin ndjesinë e parehatisë”, shpjegon dietologia italiane Lori Lieberman.
Ëmbëltuesit artificialë
Ja një motiv tjetër i mirë për t’u thënë lamtumirë përgjithmonë pijeve të gazuara pa sheqer. Një studim i publikuar në revistën “Nature”, shpjegon në fakt se konsumi i sakarinës (përbërës i cili gjendet në to) ndryshon bakteret e zorrëve të cilat kontrollojnë metabolizmin, duke shkaktuar një seri shqetësimesh gastrointestinale, që jo vetëm e bëjnë të vështirë dobësimin, por arrijnë t’u shkaktojnë kile të tjera të tepërta.
Kafeja
Filxhani i dashur i kafesë mund t’ju bëjë më shumë keq sesa mund t’ju zgjojë! “Kafeja nuk është vetëm acid, por është edhe një diuretik, që do të thotë se mund të provokojë dehidratim dhe madje edhe vjellje, ndërsa kafeina mund të nxisë traktit digjestiv dhe mund të shkaktojë diarre”, paralajmëron kështu, Katie Cavuto, dietologia dhe shefja nga Filadelfia.
Dhe sikur e gjithë kjo të mos mjaftonte, është mirë të dini se kafeja stimulon stomakun dhe prodhon acid klorhidrik, duke shkaktuar kështu urth dhe dispepsi (keqtretje). Ja se përse, nëse keni shqetësime gastrointestinale, është e këshillueshme ta limitoni konsumimin e kafesë deri në një filxhan në ditë, duke u kujdesur gjithashtu që të mos e pini me stomakun bosh.
Xhelatina (karragenan)
Ka raste kur një produkt biologjik natyral nuk bën mirë. Në rastin në fjalë, karragenan (një xhelatinë prej algave të detit dhe e përdorur si stabilizues në disa ushqime, si në qumështin e sojës, në kosin pa yndyrë dhe në përbërës për sallata) mund të shkaktojë lehtësisht shumë probleme të zorrëve.
Brokoli dhe të ngjashmet me të
“Perimet e familjes kruçifere (ku bën pjesë edhe brokoli) përmbajnë sheqerna kompleksë, të quajtur ‘rafinozë’, që mund të formojnë gazra në brendësi të stomakut, ndërsa fibrat e tyre bëhen të patretshme, duke shkaktuar probleme në procesin e tretjes në përgjithësi”, shpjegon më tej Cavuto. Megjithatë, nuk është e thënë që të eliminoni përdorimin e tyre, por t’i përgatisni ato në avull.
Çamçakëzët pa sheqer
Përbërësit që gjenden te çamçakëzët pa sheqer, shkaktojnë fryrje të stomakut dhe nëse konsumohen në sasi të mëdha, mund të kenë një efekt të dëmshëm. “Mos e stimuloni stomakun të prodhojë acidë për të cilët trupi nuk ka nevojë, sepse kjo gjë mund të provojë formimin e ulcerës”, këshillon Lieberman.
Djathi i freskët
Një konsumim i madh i produkteve të qumështit bën keq, sepse tretja që i takon stomakut, u kalohet zorrëve, duke shkaktuar dhimbje të barkut, gazra dhe diarre, shkruan Shqip. Këshilla e Lieberman: preferoni kos dhe djathë të cilat përmbajnë një përqindje të ulët të laktozës.
Misrat
Ndryshe nga se mund të mendohet, ky ushqim është shumë i vështirë për t’u tretur dhe shumë shpesh mund të shkaktojë dhimbje të forta të barkut. Faji është i celulozës që ky ushqim përmban dhe fakti se qeniet njerëzore nuk disponojnë enzimat e nevojshme për ta shpërbërë atë plotësisht. Këshilla: përtypini shumë mirë kokrrat e misrit.
Sigal