Ali Bregu
Shqipërisë
Shqipëri. moj halleshumë
Kurrë s’t’u sosën kusuret,
Krijove parti për lumë
Që s’dinë të lidhin ushkuret .
Gjuhës shqipe
Dy në tre, fjalë të huaja
Përdor Biku mendjeftujë .
Shqipe moj, t’u bëftë xhaja ,
Të mbytën si peshk në ujë.
Studentëve
Mbasi të kalojnë festat
Nëse braktisni protestat,
Do t’ju thonë, e ka të ngjarë,
Katranjozë e shpellarë.
Kompozitorit
Kur do na japësh bre burrë
Veç një këngë gjeniale,
Pa nota – plagjiature,
Të tërën origjinale?!
Këngëtarit
Teksti i këngës-kryevepër
Ndërmjet tingujsh valë – valë,
Dhe i përqendruar tepër,
S’të mora vesh asnjë fjalë.
Valltarit
Edhe vallja ka teknika,
T’i shtrish këmbët për ngahera
Andej nga t’i do muzika,
Jo andej nga t’i flak era.
Medias televizive
Ekranet ju tej e mbanë,
Plotpërplot e përngaherë,
Mbushi me politikanë,
Me hajdutë ordinerë!
