Autoritetet greke kanë dhënë në një konferencë për shtyp këtë të mërkurë pasdite, detaje të reja për zbulimin dhe sekuestrimin e rreth 700 kilogramëve kokainë, mes të cilëve edhe 137 kilogramë.
Drogë që u kap në fund të shtatorit në portin e Durrësit.
Përfaqësues të policisë dhe të doganës u shprehën se pastërtia e kokainës së dërguar nga Ekuadori ishte 85%.
Rrjedhimisht, ata kanë përllogaritur se vlera e drogës së sekuestruar i kalon 10 milionë eurot.
Lidhur mbi mënyrën se si ranë në në gjurmë të ngarkesës, autoritetet greke kanë zbuluar se sinjalizimi erdhi nga një shërbim i huaj doganor, ku më pas kontaktuan me zyrën e DEA-s në Athinë, si dhe me policinë shqiptare.
Droga e fshehur në konteinerët me banane është zbuluar në Selanik dhe në Pire, gjatë disa datave, që nga fillimi i gushtit, duke përdorur ekzamiminin me rreze X-Ray. Në disa raste droga ishte fshehur brenda mureve të konteinerëve, e në disa raste të tjera në motorët e frigoriferëve.
Në vendet ku ishte fshehur kokaina, kishte edhe aparate GPS, me qëllim që dërguesit të dinin në çdo moment vendndodhjen dhe të njoftonin pritësit e ngarkesës.
Autoritetet greke e kanë cilësuar gjithë operacionin si një sukses të jashtëzakonshëm dhe kanë bërë të ditur se në pesë porte të vendit kanë instaluar aparate X-Ray, me qëllim që siç thanë t’u heqin çdo shans rrjeteve të krimit të organizuar që të përdorin portet greke për veprimtaritë e tyre të paligjshme.