Në një lidhje me “Skype” në emisionin “Dritare me Rudinën”, ish-zëvendësministri i Arsimit , Taulant Muka ka zbuluar se një nga të ftuarat në studio, e prezantuar si studente, punon juriste pranë MASR. “
Unë nuk e shihja panelin se isha në skype, dhe ishte një vajzë që pyeste si studente, pyetje provokative alla politike. Në fakt ishtë Adelina Laci, juriste tek Ministria e Arsimit, Sportit dhe Rinisë! Çprovokime të rëndomta!”, denoncoi Muka.
Komentin e Mukës e lexoi, edhe drejtuesja e emisionit, gazetarja Rudina Xhunga, duke sjellë edhe debate në studio deri në largimin e juristes.
“Më ke ardhur për studente, por ti punon në ministri. Ti përfaqëson ministrinë. Unë mendoj që nuk mund të jesh në studio, pa të fyer fare”, i tha Xhunga, teksa i kërkoi largimin nga emisioni.
Më herët juristja e zbuluar nga Muka, si Adelina Laci tha se ka mbaruar dy fakultete, atë të Gjuhë-Letërsisë dhe Drejtësisë.
“Jam shumë e qetë, jam juriste me kontratë, jam futur me studentët që kanë fituar përmes praktikave të punës. Kam mbaruar dy fakultete, gjuhë letërsi dhe drejtësi. Unë Drejtësinë e kam fakultet të dytë, dhe kam mbaruar me rezultate të shkëlqyera. Nuk më është dashur të hy dy herë për të marrë një provim. Mesatarja ime është 9”, tha ajo.
