Filloi punimet Gazsjellësi TAP për pjesën tokësore në Shqipëri

571
Sigal

Gazeta
Telegraf/


Në Fier
filloi ndërtimi i pjesës tokësore të gazsjellësit transadriatik, që do të
kalojë në Shqipëri me një gjatësi prej 215 kilometrash. Kjo shënon dhe fazën e
parë të shtrimit të tubacioneve Fier-Berat, ndërsa deri tani janë
rikonstruktuar urat dhe rrugët që të çojnë në vendet ku kalon gazsjellësi, që
pritet të fillojë punën në janar të vitit 2020
.

Në ceremoninë simbolike, zyrtarë të lartë të vendit dhe të
projektit TAP renditën dobitë ekonomike të përfshirjes së Shqipërisë në këtë
korridor gazi. 160 milionë euro në vit do t’i shtohen prodhimit të brendshëm
bruto të Shqipërisë me nisjen e punës së këtij gazsjellësi, ndërsa deri tani
janë punësuar 1700 vetë, 90% e të cilëve shqiptarë.
 

Ian Bradshaw, drejtor i përgjithshëm i projekti TAP, tha:
“Kjo nxjerr në pah rolin strategjik të Shqipërisë. Ka përfunduar 92% e punës
(43km) për rehabilitimin e rrugëve dhe urave. 12 km tuba janë shtruar, do të
ketë mundësi punësimi, ka mëse 1700 të punësuar, mëse 90% janë shqiptarë”.

Qeveria shqiptare kërkon nga TAP përfitime të barabarta me
vendet e tjera, si Greqia: “Nuk ka qenë gjithnjë muaj mjalti, shpesh herë kemi
negociuar për të marrë më të mirën nga projekti, siç ka qenë përfshirja e
kontraktorëve shqiptarë dhe sot kemi shumë kompani shqiptare që kanë marrë
pjesë. Këto kanë sjellë dhe përfitime. Shqipëria ka pasur disa kushte jo të
favorshme krahasuar me Greqinë. Jemi në fund të një procesi negociimi për të
sjellë në balancë përfitimet, siç i ka marrë edhe Greqia”.

 
Përveç dobive ekonomike, gazsjellësi pritet të zhvillojë
industrinë e gazit në Shqipëri. Kryeministri Edi Rama tha: “Ne nuk duam të jemi
vetëm rrugëkalimi. Në harkun e 20 viteve ngrohja do të bëhet me gaz”.

Nga kufiri mes Turqisë dhe Greqisë, deri në Itali, TAP-i
do të jetë afërsisht 878 km i gjatë. Pika më e lartë do të jetë 1800 metra mbi
nivelin e detit në malet shqiptare, ndërsa pika më e ulët do të jetë 820 metra
në thellësi të ujërave të Adriatikut.