Del nga shtrati lumi Osum, gjysma e Beratit nën uji

343

SHIRAT/ Lumi shemb 4 shtylla të energjisë elektrike, përmbyt tokat e mbjella bujqësore dhe qindra banesa

Shirat e rrëmbyeshëm, që kanë rënë ditët e fundit, kanë bërë që dhe prurjet e ujërave të shtratit të lumit të jenë të mëdha. Situata e ditëve të fundit ka bërë që ujërat të dalin nga shtrati dhe të përmbytin shumë banesa në qytetin e Urës –Vajgurore, Starovë, Komunën Velabisht, fshatin Moravë, Veterik në fshatin Orizaj në Komunën Otllak etj.. Gjendja më e rënduar është në qytetin e Urës- Vajgurore, ku lumi ka dalë nga shtrati dhe ka përmbytur për së treti herë këtë qytet. Madje, banorët e lagjeve periferike, ende nuk e kanë marr vete nga përmbytjet e mëparshme. Burime nga Bashkia e Urës-Vajgurore, bëjnë të ditur për gazetën “Telegraf”, se ujërat kanë përmbytur 23 banesa dhe një sipërfaqe të madhe, tokë bujqësore, e cila ishte e gjitha e mbjell. Dëmi për fermerët është i madh. Kreu i Bashkisë, Syrja Ormenaj, u shpreh: “Jemi në një situatë tepër të vështirë. Ne, si bashki kemi evokuar përsëri familjet e lagjes periferike pasi banesat e tyre tashmë janë të përmbytura. Askush nuk po na ndihmon. E gjitha zona që shtrihet përgjatë lumit është e përmbytur, fshatra të tërë janë prekur nga përmbytjet. Situata duket alarmante”. Po një gjendje e tillë është dhe në fshatrat e Komunës Poshnje, ku ujërat e shtratit të lumit kanë përmbytur disa banesa dhe tokë të mbjellë. Gjithsesi, kjo gjendje përsëritet sa herë që bijë shi i rrëmbyeshëm, pasi shtrati i lumit Osum është i pafortifikuar me mur betoni dhe pavarësisht kërkesave të shumta për ndërtimin e tij asnjë masë nuk është marrë.

Devijimi

Rreth 13 mijë banorë të Komunës Velabisht ndodhen që prej mbrëmjes së djeshme në errësirë të plotë. Shkak për këtë janë bërë prurjet e shumta të lumit Osum, i cili ka devijuar shtratin dhe ka shembur e marrë në rrjedhën e tij 4 shtylla të tensionit të lartë. Me gjithë kërkesat e bëra nga banorët e komuna, ende nuk është marrë asnjë masë për zëvendësimin e linjës elektrike apo gjetjen e një mënyre emergjente për furnizimin me energji të 13 fshatrave të kësaj komune. Banorët e kësaj komune shprehen se gjendja është tepër e rënduar dhe se mungesa e energjisë u ka shkaktuar mjaft dëme në familjet e tyre. Kryetari i Komunës Velabisht, Kastriot Rrapaj shprehet se devijimi i shtratit të lumit, përveçse ka shembur 4 shtyllat elektrike duke e lënë të gjithë komunës pa drita, por është duke përparuar edhe në tokat bujqësore. Mungesa e energjisë elektrike ka pezulluar njëkohësisht edhe punën e administratës së kësaj komune, e cila prej dy ditësh nuk kryen asnjë shërbim për banorët dhe asnjë aplikim për kartë identiteti apo pasaportë për banorët e Komunës Velabisht dhe 2 Komunave Sinjë e Tërpan që aplikojnë në këtë komunë.