Një aksident ka ndodhur sot pasdite rreth orës 15:30, në qytetin e Korçës. Një automjet ka aksidentuar një 70-vjeçar, banor i këtij qyteti, i cili po lëvizte me biçikletë në momentin e përplasjes.
Ngjarja ka ndodhur në lagjen nr 17, ndërsa drejtuesi i mjetit mësohet të jetë larguar nga vendngjarja, menjëherë pas përplasjes.
I moshuari është dërguar në Spitalin e Korçës, ku ndodhet jashtë rrezikut për jetën dhe nën kujdesin intensiv të mjekëve. Mësohet se drejtuesi i mjetit tip “Fiat” është identifikuar dhe shoqëruar në Komisariat, si shtetasi me iniciale B.J 63vjeç, ndaj të cilit po kryhen edhe veprimet e mëtejshme proceduriale.
“Më datë 06.03.2019, në lagjen nr 17, shtetasi B.J, rreth 63 vjeç, banues në Korçë, duke drejtuar mjetin tip “Fiat”, ka aksidentuar shtetasin J.P, rreth 77 vjeç, banues në Korçë, i cili po lëvizte në rrugë me biçikletë dhe më pas është larguar nga vendngjarja.
Shtetasi J.P, ndodhet nën kujdesin intensiv të mjekëve në Spitalin e Korçës. Ndërsa drejtuesi i mjetit shtetasi B.J.,është shoqëruar nga shërbimet e Policisë në Komisariat, për kryerjen e veprimeve të mëtejshme proceduriale. Po punohet për sqarimin e rrethanave të ngjarjes.”-njofton policia.