Heshtin institucionet shtetërore përballë këtij skandali. Prokuroria pritet të filloj hetimet
Rreth 270 objekte të cilat janë zbuluar gjatë këtyre viteve pas gërmimeve në themelet e shumë objekteve të ndryshme si vila, pallate dhe lokale, rezultojnë të humbura, pa nam e nishan. Dega e Institutit Mbrojtjes së Monumenteve dhe Drejtoria e Monumenteve Arkeologjike, duket se nuk ka qenë e ashpër sa duhet dhe madje në mbledhjet e KRRT-ve , përfaqësuesit e tyre kanë ngritur dorën të parët, duke miratuar leje-ndërtimi pa hesap. Deri tani askush nuk ka mbajtur asnjë përgjegjësi, por edhe kur dikush ka folur, atë nuk e ka dëgjuar askush. Skandali me veprat e nëntokës dhe objektet në qytetin bregdetar ka vite që mbulohet, dhe fatkeqësisht edhe specialistët që në seminare dhe takime hiqen si “baballarët” e arkeologjisë dhe “ruajtësit” e flaktë të zbulimeve, kanë heshtur duke bërë paqe me shkatërruesit e vlerave tona kombëtare. Asnjë prej historianëve vendorë, asnjë prej drejtuesve të muzeve dhe monumenteve, nuk ka protestuar për shkatërrimin e vlerave nga firmat private, individë dhe qarqe të caktuara të cilat në Durrës kërkojnë të përdhosin gjurmët e historisë tonë mijëravjeçare. Institucionet kompetente dhe historianët, kanë rënë në gjumin e thellë, madje edhe më keq, ata shpesh bien në ujdi me firmat dhe subjektet ndërtuese, duke u hapur atyre shtigjet e abuzimit. Rrjeti i cili ka kohë që është shkaktari kryesor i shkatërrimit të vlerave arkeologjike në Durrës , ka arritur të bëjë “zap” të gjitha institucionet kulturore prej vitesh duke u diktuar atyre gjithçka, madje edhe ata që direkt merren me ruajtjen dhe menaxhimin e vlerave tona shekullore. Duke guxuar dhe deklaruar për shtyp nën zë se, “vlerat e nëntokës, antikiteti po ç’ groposet natën dhe po hidhet në kanalet e autostradës ndaj shteti nuk duhet të bëjë sehir më ”, i kushtoi shumë ish-drejtorit të IMK-së në Durrës dy vjet më parë. Ky realitet po vazhdon të mbizotërojë sot fatkeqësisht akoma në qytetin bregdetar, ku veç të tjerash mungon edhe fushata e sensibilizimit, e cila ka vite që është kthyer në fushatë stimulimi. Ndërkohë nga Ministria e Kulturës, duhet që nëpërmjet strukturave të saj në qytete si Durrësi ku gjithçka të vlefshme e ka nën tokë, të kontrollojë gjithë operacionet e punimeve fillestare të firmave ndërtuese, për të mos neglizhuar dhe lejuar groposjen dhe shkatërrimin e vlerave të rralla që gjenden dhe përdhosen shpesh nga gërmuesit e themeleve. Duhet që pikërisht degët e DMMK-së, të japin OK-in e fundit mbi pastërtinë e nëntokës në parcelën ku kryhen gërmimet e themeleve të pallateve në Durrës. Groposja dhe dëmtimi i mozaikëve dhe vlerave të rralla të nëntokës deri sot ka kaluar me heshtje dhe proces-verbale bajate, duke ledhatuar firmat dhe ndëshkuar atë pjesë të pazëvendësueshme të historisë 3-mijë vjeçare të Durrësit.